奶黃月餅

              今年突然之間好掛住奶黃月餅，於是就學人响網上面 Bid。之前朋友

D & D 請我食過半島酒店出名嘅酥皮奶黃月餅，我覺得焗熱咗非常好味，

去 BBQ 時，聽佢哋話今年半島酒店出嘅奶黃月餅要買到成 $300 幾蚊一盒，

而且仲買斷晒添！So, 既然响網上面見到一般蛋黃白蓮蓉都要買成 $100

幾蚊一盒；咁不如比多少少錢買盒我好想食、又平咗嘅奶黃月餅同家人分享吧

（$220一盒，有 8少個）（係正品）！

        收到嘅時候，裏面有兩個表皮裂咗，一個仲穿咗個窿仔添！But

anyway, 明白嘅，酥皮奶黃月餅真係幾難 keep 嫁，而且妹妹話一般酥皮

月餅要响完成後 3 天內食晒，否則酥皮就變成唔係酥皮！

        其實，半島酒店嘅酥皮奶黃月餅，食落去（焗熱咗）個口感同味道係

有 D 似淋淋地嘅墨西哥飽嘅酥皮；而佢橙黃色淋淋地嘅奶黃，亦好夠奶黃

香味，餡料唔會太甜，正！

       朋友們有 D就話翠享村今年嘅奶黃月餅好味（唔係酥皮），於是自己

又响網上面 bid 咗一盒試試（$100盒）。不過，妹妹同我都覺得麻麻，又

無奶黃味！而另外一些朋友話九龍酒店嘅奶黃月餅好好味，不過，我就無試

到，因為佢買到成$200 幾蚊盒（網價），同 半島差不多，咁我未試過梗係

唔買啦！Maybe, 下年試試吧！

        不過，最令我同老公有驚喜嘅係朋友介紹過嘅東海堂北海道十勝紅豆

冰皮月餅（$15/個），佢真係好好味！連我個一向對食物無乜要求，又唔好

甜品嘅老公都話好味，仲話佢哋應該唔好淨係好節日限定喎！因為佢的而且

確係好好味！有紅豆香味，食落又唔甜，希望下年佢哋會再出啦！

           其實，奶黃月餅對我嚟講係對以前嘅日子嘅一種思念，今年特別掛住

果種味道！果個年輕嘅時候，我哋仲住慈雲山嘅年代，爸爸喜歡買宵夜返嚟

嘅日子；我同媽媽總愛駛妹妹打電話比爸爸，叫佢買我們喜歡嘅宵夜，有時

係乳鴿、肉絲炒麵、豉油王炒麵，甚至係龍蝦伊麵！至於點解老點年紀幼少

的她？因為佢係爸爸嘅掌上明珠，爸爸打緊牌嘅時候只喜歡聽妹妹嘅電話

（除非佢親自打電話返嚟問我哋食咩宵夜），然後佢就會乖乖的帶宵夜回來。

        而到了中秋節，除了親戚朋友送月餅之外，爸爸總愛買一 D佢認為好

味嘅蛋黃蓮蓉∕白蓮蓉月餅回來；果次亦都係當年新出嘅月餅口味–奶黃月

餅，果次係我哋第一次食到奶黃月餅，由於大家都覺得好好味。自此，奶黃

月餅就成為咗我哋屋企每年中秋節必備嘅月餅，藉至他們搬離慈雲山！至於

果盒月餅究竟係咪出自東海，我就無從考究！我只係記得那時好幸福、月餅

好好味，以及個家唔知幾時會四分五裂，我們一家團聚慶中秋，還可以有多

少年呢？！日子總會過，回憶真可怕……要記住美好嘅日子，但奈何總是夾

雜著苦澀……


↓奶黃味超香嘅半島酒店酥皮奶黃月餅↓

↓麻麻地嘅翠享村奶黃月餅↓

↓最有驚喜又好味、又唔甜、又夠紅豆香嘅：東海堂北海道十勝紅豆冰皮月餅↓