成長於慈雲山的加得氏: 國金軒 Cuisine Cuisine

              上星期 J book 咗尖沙咀美麗酒店果間國金軒，諗住同我去試吓尼間

米芝蓮 2 星級食市，因為佢哋有個任食點心$198/位咋！而且阿 J 上次試過

中環國金果間嘅小菜，覺得幾好味。於是尋日，我就懷住興奮嘅心情去試啦！

          由於我哋係由 lobby 入去，所以要行過九曲十三灣先到…嘻嘻…其實

唔係真係咁遠，我只係覺得佢嘥咗好多位响走廊啫！當我哋以為就到嘅時候，

點知又見到一排三張嘅仿鱷魚皮紋嘅櫈，正當我哋好開心响道討論緊張櫈嘅時

候，前面突然出現嘅男人就問：『兩位小姐係咪去國金軒呢？』『請到前面ㄚ

！』哈！原來仲要經過張 designer chair先到。（唉！我仲想影番兩張相添！

點知佢又响道等我哋喎！）（到走果鎮我哋先到發現原來有部 lift 可以直達

金巴利道口嫁喎！行遠咗添！）

        入到去，原來佢哋都係用番深啡色木嘅 design，所以就算有一排玻璃

大窗；同玻璃吊飾，但仍然都係覺得間酒樓太暗。（唔…阿 J 話，尼D 深深沉

沉嘅色 tone 都係啱外國人口味多 D！）

        Waiteress 小姐開始介紹個 menu 同問我哋嘅選擇，因為佢哋尼道原

來有套餐同點心餐可供選擇；而套餐最低嘅價錢係 $160同$280蚊，套餐裏

面包括有點心、小菜同炒粉麵飯（$280 果個仲有多多一兩樣及甜品添！）。

由於，我哋唔係太肚餓，於是我哋簡番 $198∕位；有 26 款點心及 6 款甜點

任點任食嘅餐。

        我哋先選咗蟹籽波菜蝦餃、青芥末蟹籽燒賣、醬爆炸蝦丸、瑤柱炸兩及

法國鵝肝荔芋角等…嚟到嘅時候，覺得個買相 ok，而味道方面以蟹籽波菜蝦

餃及法國鵝肝荔芋角最好味！蝦餃淺綠色嘅皮夠薄、又唔會太黏、餡料又夠味

，正！荔芋角夠脆、又有一粒鵝肝比你，ok好味。不過，個炸兩就太過虛有其

表啦！油炸鬼脆就夠脆，但係咪就係得個脆字囉！油炸鬼–點為之正呢，就係

要外脆內軟ㄚ嗎，裏面嘅麵粉要有 D 軟得嚟、又要煙韌嘅質感；並唔係只得個

脆嘅外殻，而裏面乜都無囉！另外，醬爆炸蝦丸除咗會爆汁之外，就無乜特別。

        第二輪，我哋 order 咗瑤柱賽螃蟹餃、露筍帶子鳳眼餃、 沙律明蝦

角、蒜蓉瑤柱春卷、X.O.醬炒蘿蔔糕、薑蔥牛栢葉及生煎菜肉窩貼，由於是

任點任食嘅關係，所以大部份嘅點心都會按照人頭計；一人一件，不過部份點

心，如：炸兩、炒蘿蔔糕及腸粉…等就要成碟上。尼道最值得讚係 service，

因為不論係 wariter 及 waitress 都會常常幫你斟茶嫁，又有禮貌，而且仲有

個暖爐暖住壺茶！講返 D 食物嘅味道，我同阿 J 都發覺，佢哋 D 用蝦嚟做嘅

食物真係唔錯，D 蝦又夠爽口彈牙；炸野亦都夠脆、又好味，唯一除咗個生煎

菜肉窩貼！因為佢個外皮煎得唔夠脆、又韌，你有無食過熱得嚟又韌嘅窩貼ㄚ

！（連阿 J 都話覺得自己煎嘅急凍餃子煎得仲好過佢！But, 阿 J 嘅廚藝係有

限嫁至喎！哈哈！So, what do you think about this？當然係–not

good 啦！）

         而X.O.醬炒蘿蔔糕，你係食唔到有 X.O.醬之餘；仲食到你成口粉，

咁有“蘿蔔”味嘅粉，你仲會唔會食呢？個薑蔥牛栢葉，無嚟彈性又唔爽；

淋 pat pat 咁，D 醬汁嘅味又令到你好似食咗啖攪唔均 D 粉嘅茨汁一樣，

包你唔想再挾第二嚿。唉…雖然用 D 蝦嚟做嘅點心好好味！不過，當你食嚟

食去都係差唔多味嘅餡料果鎮，你就會覺得食之無味！我突然覺得，以前 D

中式酒樓嘅點心點解咁好味呢？！就係因為人哋每種點心都有屬於佢哋各自

嘅配料，那時嘅點心師父真係有用心去做；反觀而家 D 點心，精緻就精緻，

但只可惜係空有其外型分別，而內裏之餡料都係一式一樣；令人覺得食一樣

同食兩樣都無乜分別，食到個口都寡晒，咁真正嘅點心精髓何在？

         係越食越無癮嘅情況之下，我同阿 J 決定食完甜品就埋單走人，所以

就點咗 4 個甜品：紅豆沙、焗燕窩蛋撻、芝蔴糊豆腐花及呂宋香芒布甸嚟做

last order！至於甜品嘅味道，唉……其實，你睇到 D相嘅色澤就係 exactly

同真品一樣嫁嗱！吓？！無錯，尼 D 就係米芝蓮 2 星級食市所出品嘅甜品啦！

除咗紅豆沙嘅味道係正常 D 之外，焗燕窩蛋撻–個樣完全唔吸引，色澤又啞、

味道又太騷，牛油味及奶味太重，完全唔覺得佢係用蛋漿整出嚟！個口感十足

十酥皮布甸！蛋撻嘅酥皮完全係唔掂，旺角金魚街嘅康年做得仲好過佢！

        呂宋香芒布甸–味道就像普通布甸一樣，芒果都有幾粒嘅！總之許留山

一定好過佢囉！起碼有芒果嘅香味。嘩！全場最差嘅甜品就係芝蔴糊豆腐花嗱

！芝蔴糊，苦嘅！D芝蔴嘅粗粒好似無隔過一樣，再加响無味又唔滑嘅豆腐花

上面…唏…真係超難食！若然唔係係酒店，阿 J 幾乎想吐返出嚟添！

            其實响尼道當普通酒樓飲茶，大至上係 ok嘅！不過，佢貴為米芝蓮 2

星級食市，我同阿 J 當然對佢嘅要求會高 D 啦！而且，點心好唔好，真係好

睇個點心師父放咗幾多心機落去嫁，但係係尼道我哋就睇唔到囉！所以我哋

就覺得佢唔值 2 星囉！Maybe, 小菜可能好 D 啦！因為其他人都有點小菜，

若你都係想一嚐佢嘅點心，我建議你可選擇佢哋嘅套餐，因為裏面都有幾款

點心嫁！

        埋單 $450 兩個人，唉…早知我哋就簡套餐好過啦！唔抵！ㄚ！今次

又一証明我哋米芝蓮級數同外國人嘅米芝蓮級數係唔相同嘅，階因我哋注重

嘅係食物本身嘅質數多過：環境、氣氛、serivce 及 dish set 囉！所以我哋

為咗一嚐心頭美食，可以走去地茂大排檔，也不介意。不過，阿 J 話相信中環

國金（國際金融中心 2期）應該會好 D 掛！

P.S.：–

$198+10% 嘅任點任食點心只限星期 1~5 嘅 12:00p.m開始咋！其餘時間

嘅點心價錢由 $48∕碟，起跳嫁！