今日學整嘅–黑森林蛋糕

               今日超開心，因為我學整嘅第一個黑森林蛋糕作品完成了，除咗得到

好多人讚賞之外，老友阿 E 仲話個好好味添！哈哈……我都覺得味道唔錯，

又唔會太甜！今次信心返晒嚟，希望星期二整比老公嘅薄菏朱古力 mousse

蛋糕都會好味啦！ㄚ！嚟緊我仲想學整馬卡龍（Macaron）、忌廉泡芙、朱古

力心太軟同芒果酥皮拿破崙……唔流口水 ing 中！我今日見到人哋整嘅

馬卡龍真係好似好美味咁！顏色又靚喎！

        當我一路整蛋糕嘅時候，竟然覺得好幸福……原來能夠被美食包圍及

制作美食都可以好開心嫁！

         想問黑森林蛋糕點整？Okok！唔駛心急，做法 & 食譜如下：–


Step 1 先要做朱古力海綿蛋糕：–

6" 朱古力海綿蛋糕材料     i)  雞蛋           3 隻
                                ii)  砂糖        80 g（最少唔好低過 70g）
                               iii)  低筋麵粉   55 g
                              iv)   谷咕粉     15 g（我今日用咗 17g）
                               v)   菜油        30 g（可以改用牛油，但我建議
                                                            都係用番菜油好 D！）
                                   (牌子係美國嘅 “Wesson”菜油)
                             vi)  花奶         2 茶匙

制法：–

1) 將雞蛋與砂糖放入盆內攪拌混合，（砂糖要分三次加入攪拌）即係要將蛋

    漿打至企身白色 cream 狀為止，泡沫要幼細便停止。（以 cream 可以

    在泡沫面寫字為準則）。

2) 將已篩過的低筋麵粉及谷咕粉分多次加入白色cream 狀之蛋漿，（最少要

    篩過 3 次），要注意攪的時候切勿太大力，要輕輕兜底攪均，否則會令到

    D cream瀉晒身！（記緊一定要將粉粒攪均，如果唔係個蛋糕焗起會有一

      粒粒。）

3) 當攪均所有粉粒後，再加入菜油、花奶輕輕攪均。

4) 將谷咕粉蛋漿倒入舖滿牛油紙的蛋糕模中，以 180℃ 焗約 30 分鐘。（記

    緊焗爐必定要預熱！）

  （請將模內之谷咕粉蛋漿，垂直‘蹬一蹬’佢，等 cream 裏面嘅氣泡浮出，

     然後整穿氣泡朝掃平表面。）

5) 海綿蛋糕必須要灘凍，才可切成三等份（面頭及底面唔要）。

6) 切的時候最好用刀切入少少沿住形狀慢慢切一圈，然後才慢慢切過去，

    這樣蛋糕才無咁易切爛。

Step 2  黑森林蛋糕材料（6"）：

   i)  植脂忌廉 300 g
  ii)  黑車厘子     1 罐 （6"約用 16 切開一半就夠。罐頭建議用“SW”
                                   好味得嚟又無藥味。）
 iii)  黑加侖子蒟篛   2 粒 （or 改用啫喱，不過啫喱要整略為硬。）
 iv)  生果、朱古力碎片或朱古力醬 （適量）


制法：–

1）將植脂忌廉打至企身變 cream狀為止，放入雪櫃雪凍備用。（攪拌方法與

    做蛋糕的蛋漿相同。）

2) 將蛋糕饀料（生果∕啫喱∕蒟篛）切粒備用。（黑車厘子切開一半。）

3）先將蛋糕放在轉盤上，然後將已雪凍的植脂忌廉平均塗上，再輕輕括平；

    然後將切好的黑車厘子及蒟篛隨意放在忌廉上；再塗上忌廉抆平，跟住再

    將第二層蛋糕蓋上，輕輕按一按；之後從覆之前步驟。

4) 舖上第三層蛋糕之後，將忌廉輕輕塗上再慢慢括平修飾。

5) 修飾好蛋糕後，可因應個人喜好加上各種生果、朱古力碎片、朱古力醬或

    糖霜……等。

如要整我張相嘅朱古力片裝飾圍邊，就必須要用“免調溫朱古力”溶醬後，量好

蛋糕嘅高度後畫好在牛油紙上，再按自己喜好隨意畫上，之後放入雪櫃，

雪凍後備用。（用“免調溫朱古力”溶醬，朱古力可快速凝固！）

↓與好友分享美味的成果！Good………↓