觀塘–米桶越南餐廳

            星期三同阿 J 約好响 觀塘apm 食 Lunch∕Tea，但 J 話 apm經已無乜

好食，不如試吓去新開嘅鱷魚恤中心，果度同apm  打通咗；又有兩間睇落幾好

食嘅舖！OK！行到去先知一間係食日式咖喱嘅叫 CoCo 壱番屋，而另一間係我

愛食嘅越南菜米桶，因為J 個胃唔舒服，所以我哋決定去米桶。阿 J話 Lunch

hour 果鎮，間咖喱店成日排晒長龍，下次佢好番我哋再去！

        由於係 2:00點幾，所以入到去米桶都無乜人，得幾枱客。睇吓個 Menu

，其實平均 $43–$56個 set，一 D 都唔平；但係佢哋會附送一個小食，再加

多 $4 就有個 drink，即係平均每個人 minimum pay $50。在我記憶中，以

觀塘嚟講略貴了點，但可能隨住 D 大型商廈落成，所以尼個價就算平掛？！

         坐底之後，就大數果日去 Ocean Terminal 果間金牛苑幾唔抵！佢話

簡直係略水，又貴又唔好食；淨係得個 view，我話無偈，家鎮 D 食店係咁上

下，佢仲要係响尖沙咀嘅Ocean Terminal 喎！佢話真係想影抵果碟成 $80

蚊嘅小小豆腐比我睇吓幾唔抵！不過，果個成嚿水嘅（$100）宮崎牛肉河 D

牛肉真係 OK 嘅，姑勿論係咪真係嚟自日本嘅宮崎縣（但日本牛肉唔係有部份

禁止出口嗎？），但 J 話 D 牛肉真係有 D溶係口嘅感覺！果餐兩個人食咗成

$500 蚊，仲要唔好食！

          講講吓！我哋 order 咗嘅百花蟹肉湯河及炸札肉小食就嚟咗，上菜

速道快，唔知係咪過咗繁忙時間呢？！ D 食物熱辣辣，正！抵讚！一啖食落

去，有少少蟹味、唔太鹹；個做法有 D 似炸蝦餅，有口感得嚟唔會太淋，味

道唔錯！至於，湯河嘅湯底夠味、唔太鹹，個河粉係幼身，無乜特別，但唔

會瀉晒身我就 OK（即淋到胡了）！

         個炸札肉做法好特別，札肉我食得多；但未試過咁食法，好香口，正！

之後，豬頸肉撈檬、春卷和薄餅都到咗。個豬頸肉果然係入味、夠香，正！

至於撈檬都 OKㄚ！春卷炸得好脆，不過食果鎮要小心熨口，因為入面 D芋蓉

都索油，所以好易淥親！由於有芋蓉，所以很香口、味道唔錯。但我同 J有個

疑問，乜越式春卷無菜包住嚟食嫁咩？還是我哋成日將星馬泰菜攪亂呢？！

         整餐飯，除咗個得 1∕4嘅青檸嘅熱檸水同薄餅之外，都好好！老實講

，我同 J 都認為，無論如何香港都好難再搵到個薄餅；及得上當年蕉葉嘅

油酥餅嘅味道，我哋真係好懷念又平又好食嘅蕉葉呀！ J 話喎，想食蕉葉就

要去上海，因為佢淨係係果道見過咋！Oh！Too Bad！所以尼餐飯算係好唔

錯嫁啦，又無乜味精；埋單都只係 $100 蚊倒，我哋非常滿意，連嘴尖嘅 J

都話早知响道食，好過去尖沙咀金牛苑！

米桶越南餐廳

鱷魚恤中心 1/F,

開源道 79 號，觀塘