成長於慈雲山的加得氏: 岡田咖啡

2011年3月11日星期五

岡田咖啡–$88 蛋糕放題

             原本同阿 J 約好去尖沙咀嘆一個 $88 嘅蛋糕放題，去到先知原來係

我一直都想試嘅岡田咖啡，尼個蛋糕放題係由 2:30-5:30p.m.開始，$88+

10%∕人，每人限食一個鐘包一個 drink。尋日我同阿 J 2 點 40分先到，不

過好彩都有位，雖然未至於 full 晒；但都係無乜得幾多位剩，所以想好好咁

嘆番個 tea都係 book 定位好 D，因為愈晏就愈多人，後來仲要排隊等位添！

        坐底之後個男經理再 remind 我哋話個蛋糕放題只係限食一個鐘，而飲

品只係包一杯，每次 order 一人只係可以 order 兩件，食晒先可以再叫。其

實都好嘅食完先至再叫，咁可以避免浪費食物。

        由於阿 J 個胃有 D 唔舒服所以唔可以飲咖啡，於是我就自己試一試尼

隻嚟自日本嘅咖啡。咖啡的確係有炭燒嘅香味，佢哋棄用咗奶∕鮮奶；而係

改用 cream（廣告話，可以令 D 微酸嘅哥倫比亞咖啡豆變得更香醇），我

就覺得咁樣的確係令到D 咖啡好飲 D、滑 D，不過又未至於去到好與別不同

囉，但係佢咁樣飲法又的確係好飲過一般美式咖啡，因為佢滲住淡淡嘅炭燒

咖啡嘅香味，可能係同佢哋有即日炒香過 D 咖啡豆有關啩！

        講返 D cake，頭一 round 我哋order 咗：抹茶紅豆蛋卷、日式鮮

果玉子蛋卷、朱古力 mousse蛋糕 及咖啡 mousse 蛋糕。先講抹茶紅

豆蛋卷嘅味道，我同阿 J 都覺得 D紅豆係好好味嘅；甜嘅 cream同紅豆配

上抹茶味蛋糕的確係 prefect match，讚！（不過阿 J 仍然都係覺得佢偏

甜嘅！而蛋卷本身唔夠軟熟，略為硬身少少， J 話加連威老道果間 Roll 嘅

蛋卷做得好 D。ㄚ，下次我要試吓先得！）不過雖然佢哋嘅蛋卷係略為硬身

咗 D，但係個日式鮮果玉子蛋卷真係會有驚喜比你，因為佢除咗有鮮果嘅

香味之外；D cream 竟然會有 D 似雪糕喎！好好味呀！（唔知你哋仲記唔

記得以前超巿層經出過一種雪糕蛋糕呢？真係有 D 似嫁！）可能係因為D

cream 要凍藏，所以蛋卷略為硬身咗少少係的確可以接受嫁！

         朱古力 mousse蛋糕D mousse 的確係有好香嘅朱古力味，不

過仍然都係偏甜，若然要一個人食晒兩、三件 mousse蛋糕的話，我相

信會漏到你唔想再食第二、三個 round 囉，如果有倆個人分擔的話，相

信你會食得更加多 D同開心 D。（因為可以試多幾款ㄚ嘛！）不過若然

你係得一個人嘅話，咁就建議你千祈唔好响第一、二 round 叫 mousse

cake 啦！因為佢哋响第一 round 所比嘅蛋糕個 size 會足 D（大件 D）

，如果開頭已經食到漏晒，試問你仲點可以再進攻其他 cake 呢？（ㄚ！

唔知尼 D 係咪商業策略呢？！因為佢哋第二 round 嘅蛋糕好明顯個 size

經已 cut 番細 D、正常 D，若然第一 round 嘅 size 都係咁咪好囉！）

        而 mousse cake 之中我哋只係試咗朱古力同咖啡，因為實在係

太漏啦！已經無興趣再試士多啤士同抹茶 mousse 啦，因為怕果 D會更

加甜！我就覺得咖啡 mousse 蛋糕 好值得讚，因為的確係好香咖啡味！

第二 round 我哋order 咗：泡芙及 New York chesse cake, 個泡芙都

幾好味。（不過要注意佢面頭係有花生嫁！）唉…估唔到個 New York

chesse cake 嘅味道竟然係咁差嘅！阿 J 話佢嘅味道有 D 似食緊啖奶粉

，不過我就認為佢完全係唔夠芝士味，又唔係奶味、一 D都唔滑；一篤落

去就散開晒，食落口個感覺仲好似食緊 D 勁乾嘅薯蓉咁，又無紋無味…唔

……感覺很差！

       第三個 round 係個男經理 remind 我哋 last order（的確係嘅出面

咁多人仲排緊隊！），所以我哋order 了重點想食嘅：泡芙、士多啤梨蛋

糕、特濃朱古力蛋糕同日式蕃薯栗子蛋糕。（E！阿經理，又話每人每次只

係可以 order 兩件嘅，點解隔籬果枱日本人，就可以一人叫 4 件嘅？！你

大細超喎！係咪其視我哋先？我同阿 J 細細聲講。）除咗個漏到痹嘅日式

蕃薯栗子蛋糕之外，其他蛋糕嘅味道都 ok 嘅！因為當你食果件蕃薯栗子蛋

糕果鎮，會覺得自己好似將成嚿蕃薯蓉擺入個口咁，D 蕃薯味完全掩蓋咗

栗子嘅香味、又勁甜…唔…麻麻地！雖然特濃朱古力蛋糕嘅質感有 D 似

new york chesse cake，但唔知係咪 D 朱古力夠濃郁呢；篤落去無散開

噃，而且食落個 feel 又幾唔同喎！感覺上仲無咁兀突，好味好多，個口感

有 D 似食緊啖好 rich 嘅朱古力咁！ok 嫁！

        總括嚟講成個 tea 係 ok 嫁，可以去試！正如阿 J 話齋只要你可

以食到三件 cake，咁你就可以返到本啦（抵番晒）！成個蛋糕放題我哋只

係無食到士多啤梨 mousse 同抹茶 mousse cake啫，都算係回到本ㄚ！

埋單 $194。注意個 tea 係星期一至日，每人限食一粒鐘嫁咋！記得要

book 位呀！

P.S.: -

必食推介：–日式鮮果玉子蛋卷、抹茶紅豆蛋卷、咖啡 mousse 蛋糕

                   、泡芙及特濃朱古力蛋糕。